مجرد هذره .. (:

حبكت ..؟؟

ليش لما يصير عندنا امتحان بعد يومين او ثلاث .. احنا بهالايام نحب كلشي ما كنا نحبه او ننوي نسويه وما تضبط السالفة ..وينزل علينا السنع و المنع .. يعني ليش حبكت قبل الامتحان بيوم اصير ودي اقرى كل الكتب الي عندي بالمكتبة .. وودي ارتب داري وودي اروح اشرب قهوة مع امي و ابوي و ودي اسوي اي شي في سبيل اني ما ادرس .. يعني من صج لييييييييييييييييييييش ؟؟

:

:

العلاقة بين الامهات وكلمة لااااااااااء..

هذا موضوع نقاش كان بيني وبين رفيجاتي بالجامعه شنو العلاقة و الرابط بين الامهات وكلمة لأ ؟؟ ليش الامهات وايد منهم يحبون يقولون لاااااااااااااااااااااااااء ؟؟

يما بروح المكان الفلاني .. لأ .. يما بروح المكان العلاني : هم لأ ..نزين يما تسمحين أقعد بالبيت .. لأ
لوووول ..

الأم في كل أحوالها عسل على القلب .. لمن تقول لأ و لمن تقول لأ و حتى لمن تقول لأ ..لان ماكو غير هالاحوال .. لأ و لأ و لأ ..

!!!

:
:

ادمان الانترنت ..!!

بالبيت .. بالكلية .. بالزوارة .. بكل مكان لازم اللابتوب شابك معاي .. ووقتي احيانا ادور وين راح وليش كله يضيع اكتشف اني كنت مبسطة على العنترنت ..كلمن قام يلومني .. بسج .. بسج .. شنو طلااابه .. ماصارت لابتوب .. بالكلية ما اصدق يصير عندي فراغ عشان اشبك .. ومن اشبك يبدي ازعاج المزعجين حوالي .. انتي بسج شنو ادمان .. سولفي معانا .. طبعا ساعات اذا طق العداد عند رفيجاتي عادي يسكرون اللابتوب فجأة وانا حدة مندمجة بقراءة موضوع .. عاد أنا فجأة ويهي يصير أحمر .. عاد فجأة أبي أعصب .. عاد فجأة .. ابتسم و استوعب الوضع واني مصختها لازم اجابلهم شوية ..

وعلى هالطاري .. انا فعلا مستغربة شنو الشي الي يخلينا نندمج بالانترنت بهالطريقة .. بالنسبة لي اذا اندمجت بقراءة موضوع عادي اصير لا اسمع لا أرى لا أتكلم وعادي ما استوعب اذا احد قاعد يناديني الا لمن يطقني أو لمن ينزل شاشة اللابتوب و لا يهزني ..

سبحان الله احس الانترنت عالم ..وحياة بالضبط نفس الحياة حوالينا .. نتكلم بصمت و نطلع على اخبار العالم هم بصمت ..الاشخاص ما نشوفهم بعيونا لكن نشوفهم بأفكارهم و أحرفهم الي تعكس لنا شخصياتهم

الحقيقية ..

الانترنت و بالنسبة لي المنتديات على وجه الخصوص اصبحت جزء من برنامجي اليوم و اذا ما شفت شقاعد يصير بالمنتدى و شنو المستجدات احس بشيء ناقص ..

يعني مثلا أنا الحين قاعده أتكلم بس قاعده اتكلم باللغة الي يفهمها العالم الانترنتي ويسمعها واهيا لغة الكتابة و الحروف و بعد ما اسولف و اقول سوالفي (( مع العلم اني قاعده اكلم روحي .. الكيبورد و الشاشة )) بس لمن اكتب واخلص احس براحة و اشعر (( حلوة اشعر ها )) اني سولفت و عبرت .. ما احس اني قاعدة بروحي .. ممممم شي غريب و الله

حتى نفسياتنا ممكن تتأثر بالعالم الانترنتي و الأمور اللي تعرض و تنظرح و تناقش و أنا من ناحيتي وايد قناعات تغيرت من خلال القراءه و المناقشات في المنتديات .. نقدر نوصل حق كل العقليات و نطلع على جميع الاراء و الاقتراحات حول موضوع معين ..

سبحان الله شنو يعني ان نتأثر بأحرف مكتوبه ؟؟ و تأثر بحياتنا جمل وحروف نجهل منو يكتبها .. ؟؟ الانترنت صج صج عالم غريب .. و ما يدور فيه اغرب .. ومثل ما يقولون انه سلاح ذو حدين لازم نعرف شلون نستفيد منه لصالحنا و نبتعد عن سلبياته..ناخذ الذين و نخلي الشين ..

قاعدة أحاول اقنن ادماني و اخفف شوية .. رحمة بالناس حوالي و رحمة بوقتي المزدحم !!

صج اني قاعدة استفيد وايد و تعلمت اشياء ما توقعت اني راح اتعلمها .. بس هم الموازنة مطلوبة ومثل ما يقول الرسول صلى الله عليه وسلم بما معنى الحديث ان لنفسك عليك حقا و ان لأهلك عليك حقا و يجب ان نعطي كل ذي حق حقه .. و خير الامور مثل ما قال الحبيب صلى الله عليه وسلم (( الوسط )) بس مو الوسط الديمقراطي .. طبعا :P

:

:

اذاعة سلام اف ام ..

أول شي اشيد بدور القائمين عليها و انجاز نفتخر فيه ..وفكرة ولا أروع .. و جهود تستحق الشكر و الثناء و الدعاء بعد ..لكن شالسالفة و شقاعد يصير احيانا افتح ابي اسمع نشيدة تفتح النفس .. فجأة تقول قاعدة اسمع (( فرقة التلفزيون )) يحطون اناشيد لا كلمات لا ايقاع لا بطيخ نفس الناس .. والله جني قاعدة اسمع بالضبط بالضبط اغنية ..

أحس لازم نراعي السمت و الاطار الاسلامي و اتمنى ان الاذاعة تراعي هالقضية .. ما امانع الاناشيد الي بايقاع معقول لكن في اشياء يعني اسمحولي وايد بزيادة ومالها داعي كلش .. بحاول اوصل لهم و أوضح لهم هالشي .

يستــــــــاهلون كل خير..
:
:

حدسدس .. (؛

حدس (( الحركة الدستورية الاسلامية )) كثرة الهجوم عليها تخليني احس انها نفس الشجرة الشامخة الي ساقها طويل و يحاولون بعض الأطفال و الصغار رميها بالحجارة .. لكن هالشي لا قاعد يهزها أولا و لا قاعد يأثر على عطاءها و بنفس الوقت اهمه يتعبون و اهيه واقفة بشموخ (( لن يضروكم الا اذى ))

الله يوفقهم ..

:

:

فجأة كَلِمات P :

ممم.. ليش ساعات ابناء الجيل الواحد يهبون بكلمة فجأة .. و تصير الكويت كلها تتلكم فيها ..

بكتب بعض الكلمات الي نستخدمها و بعضها يضحك ويناسب بعض المواقف ..

بس كله بكوم ولمن ايي واحد توه متعلم كلمة و يستخدمها غلط بكوم.. مثل هذا الي راح البقاله قاله لوسمحت عطني واحد ديو وفجأة صمونة !!!

:

من الكلمات ..

:

اشدعوة عليج ..

من صجج ؟؟ ..

أهم شي ..

أي شي ..

كوجة مراحب ..
يرحم امك ..

حدج..او حده حده حده
على وضو ..

كلش ملش..

مشتط ..

داش بقوة ..

حبكت..

ماخذ بنفسك مقلب

خيييييييييير ان شاء الله ..

اي هين ..

انطرني اقول ..

ما تشوف شر ..

عسى ما شر ..

من صج .. !!

من نوع

ستايلي ..نوعي

استوعبتيني ؟؟ (( يعني فهمتيني ))

لا تحنج .. et7anich

لا تنح بويهي ..

ابيه و في ناس يقولون امبيه .. (( كلمة بنات ))

الكلمة صعبة ..

حدج خطيرة ..

bs. still

طيري زين ..

شي ما شيات .. (( قديمة ))

بس عااااااااااد ..

قلاص ملاقة و لا تملق ..

سخيفااااااا ..

رزة فيس .. (( اذا حبينا نترجمها تصير عيشة و يه )) ((:

انا ورفيجتي ال close

لا يوقف ..!!

لا تستعبط ..

talk to th hand (( كلمي الايد .. حقوق الطبع محفوظة حق رفيجتي))

ماكو شغل (( متأثرين بلغة البنقال ))

:

:

ممممم .. تعبت وانا اهذر ..شسمه بروح اشربلي قهوة فجأة من ايد خدامتنا الظريفة و ارد عالمي الانترنتي

لاتابع الجديد .

وقبل لا انهي السالفة أو بالاصح الهذرة .. باجر اليمعة (( الجمعة )) فلنكثر من الصلاة و السلام على الرسول .. اللهم صلي و سلم وبارك على سيدنا محمد على اله و صحبه وسلم ..

مع السلامة ..

sara